||


موقع البلد ام الفحم والمنطقة


وصلت الى بريد موقع البلد رسالة من رجل يطلب ارشاد ونصيحة؟.

 

مرحبا .. انا رجل عمري 38 عام متزوج وعندي بنتين , مشكلتي اني ولدت مشلول لا استطيع المشي ابدا , مرتي قبلت فيي بوضعي هاذا وما اشتكت وقالت انها راح تقوم فيي بعد ما فكروا اهلي انهم يزوجوني من اكم سنة .

اتزوجت والحمد لله واجاني بنتين بس الي متعبني كثير المشكلة الي انا مستحي منها وما غدرت احكيها لحدا انو مرتي بتضربني وبتلطش فيي كتير , كل ما اتناقر انا واياها بتمد ايدها علي وبتضربني ان كان على وجهي او بتخبطني على اجري .

هاذا الوضع زاد عن حدوا كتير وصارت لما اطلب منها ايشي او انها تساعدني اتحمم او اعمل اي ايشي كان تمد ايدها علي بعصبية وما تخلي اهانات ومسبات علي وعلى الساعة الي قبلت تتزوجني فيها وبضل تقول انها ابتلت فيي وربنا بلها وتزوجتني .

الوضع ما بنطاق وانا ما بغدر احكي عن هادا الموضوع لحدا لاني زلمي وكرامتي ما بسمحلي وما لقيت غير اني اكتب مشكلتي لناس ما بتعرفني لحتى يساعدوني , لاني مستحيل احكيها لحدا ثاني .

اصعب ايشي صار انو بناتي بلشن يوعين ويفهمن كل ايشي ومرتي بتعمل عمايلها معي من كفر وصياح وضرب قدام بناتي وانا ويلي ما بدي احكي لحدا ويلي مش غادر امنعها بالرغم اني حكيت معها اكثر من مرة .

ساعدوني شو اعمل , انا بحيرة كبيرة وبنفس الوقت ما بغدر اطلقها لانو ما في حدا يقوم فيي اذا تركتها وما الي غيرها وغير ولادي …هل اطلقها واجرب اتزوج وحدة تانية..بس مين الي راح تقبل فيي ؟ شو اعمل ساعدوني مش عارف شو اعمل  مشان الله؟.

نؤكد انه وحفاظا على النزاهة والمصداقية ننشر الرسالة كما وصلت الى البريد، من دون زيادة او نقصان، وبدون تعديلات لغوية او تصحيح اخطاء املائية.

 

 


تفضل بالرد

عنوان بريدك الإلكتروني لن يتم نشرة.